Bu gündən etibarən Azərbaycanda mopedlərin idarə edilməsi ilə bağlı yeni qaydalar tətbiq olunmağa başlayır. Artıq moped idarə etmək üçün sürücülük vəsiqəsi tələb olunur və bu nəqliyyat vasitələri dövlət qeydiyyatına alınaraq uçota götürüləcək.
Qanuna əsasən, moped dedikdə, kiçik elektrik nəqliyyat vasitələri istisna olmaqla, elektrik mühərriki olan və ya iş həcmi 50 kub santimetrdən çox olmayan mühərriklə hərəkətə gətirilən, maksimum konstruksiya sürəti saatda 50 kilometrdən yüksək olmayan iki və ya üçtəkərli nəqliyyat vasitəsi nəzərdə tutulur. Asma mühərrikli velosipedlər və oxşar xüsusiyyətli digər nəqliyyat vasitələri də bəzi maddələr istisna olmaqla mopedlərə bərabər tutulacaq.
Dəyişikliklərə əsasən, Azərbaycan ərazisində bütün mexaniki nəqliyyat vasitələri və onların qoşquları, eləcə də mopedlər müvafiq icra hakimiyyəti orqanının müəyyən etdiyi qaydada dövlət qeydiyyatından keçirilərək uçota alınmalıdır.
Yeni qaydalara görə, ölkə ərazisində yollarda mopedi idarə etmək hüququ yalnız “A1” kateqoriyalı sürücülük vəsiqəsi əsasında mümkün olacaq.
Bundan əlavə, mopedlər yol nişanları və nişanlanmanın tələblərinə riayət etməklə, mümkün qədər yolun sağ kənar zolağı ilə hərəkət etməlidirlər. Həmçinin motosiklet və ya mopedlə onun qabaritlərindən 0.5 metrdən artıq kənara çıxan və ya idarəetməyə mane olan yükün daşınması qadağan edilir.
Baş Dövlət Yol Polisi İdarəsi (BDYPİ) moped sürücülərinə müraciət edərək bildirib ki, 2026-cı il martın 26-dan etibarən mopedi idarə etmək üçün “A1” kateqoriyalı sürücülük vəsiqəsi, nəqliyyat vasitəsinin qeydiyyat şəhadətnaməsi və dövlət nömrə nişanı tələb olunacaq.