Milli Məclisin deputatı Aydın Hüseynov bildirib ki, 31 Mart Azərbaycan xalqının yaddaşında dərin iz buraxmış faciələrin anım günüdür. Bu gün, 1918-ci il mart hadisələrində həlak olan minlərlə günahsız insanın xatirəsi ehtiramla yad edilir. Həmin hadisələr xalqımızın üzləşdiyi tarixi ədalətsizliklərin acı nümunəsidir.
Deputat qeyd edib ki, bu günün dövlət səviyyəsində qeyd olunması Heydər Əliyev tərəfindən verilmiş siyasi-hüquqi qiymətin nəticəsidir. Bu qərar milli yaddaşın qorunması, tariximizin unudulmaması və gələcək nəsillərə düzgün çatdırılması baxımından mühüm əhəmiyyət daşıyır. Ulu öndər Heydər Əliyevin bu istiqamətdə atdığı addımlar tarixə verilən dəyərin nümunəsidir.
Aydın Hüseynov əlavə edib ki, Azərbaycan xalqı tarixin müxtəlif mərhələlərində, o cümlədən Birinci Qarabağ müharibəsi dövründə də oxşar faciələrlə üzləşib. Bu hadisələr xalqımızın yaddaşında böyük ağrı və itki hissi formalaşdırıb.
Deputatın sözlərinə görə, 31 Mart təkcə keçmişi xatırlamaq günü deyil. Bu, həm də tarixdən nəticə çıxarmaq, milli birliyimizi gücləndirmək və belə faciələrin bir daha təkrarlanmaması üçün çalışmaq günüdür. Cəmiyyət olaraq həmrəyliyimizi qorumaq, tariximizi düzgün öyrənmək və gələcək nəsillərə çatdırmaq hər birimizin borcudur.