İnfarkt və insult hallarının əksəriyyəti səhər saatlarında baş verir. Rusiyalı genetik Konstantin Krutovskinin sözlərinə görə, bu, saat 06:00-dan 11:00-a qədər olan dövrdə daha çox müşahidə olunur.
Səhər saatlarında risk niyə artır?
Krutovski bildirir ki, səhər oyanma prosesində orqanizmdə fizioloji dəyişikliklər baş verir. Kortizol hormonu artır, təzyiq yüksəlir, nəbz sürətlənir. Ürək-damar xəstəlikləri olan insanlar üçün bu stres infarkt və ya insulta səbəb ola bilər.
Səhər saatlarında arterial təzyiqin yüksəlməsi, qan damarlarının tonusunun artması da ürəyə əlavə yük verir. Bundan əlavə, səhərlər qanın laxtalanma riski də artır.
Risk qrupunda olanlar nə etməli?
Həkimlər səhər təzyiqin anidən yüksəlməsinin qarşısını almaq üçün bəzi dərmanları axşamdan qəbul etməyi məsləhət görürlər. Risk qrupunda olan şəxslər yuxudan oyanan kimi ağır fiziki işlərdən uzaq durmalı, orqanizmin özünə gəlməsi üçün vaxt verməlidirlər.
Qeyd edək ki, gecə həyat tərzinə üstünlük verən insanlarda ürək-damar fəsadlarının pik vaxtı daha gec saatlara təsadüf edə bilər.