Smartfon batareyası ilə bağlı yanlış inanclar
Smartfon istifadəçiləri arasında batareyanın ömrünü uzatmaq üçün yayılan bəzi məsləhətlər əslində köhnəlmiş miflərdir və hətta cihazın batareyasına zərər verə bilər. Telefonu düzgün şarj etmək üçün bu yanlış vərdişlərdən uzaq durmaq lazımdır.
Müasir batareyalar və onların xüsusiyyətləri
Müasir smartfonlar litium-ion və ya litium-polimer batareyalarla təchiz olunub. Bu batareyaların şarj dövrləri məhdud olsa da, qoruma və optimallaşdırma sistemləri sayəsində daha effektivdir. Bəzi vərdişlər batareyanın ömrünü uzatsa da, bəziləri zərərli ola bilər.
Ən çox yayılmış miflər
- Telefonu tam boşaltmaq lazımdır: Telefonu şarj etməzdən əvvəl tamamilə boşaltmaq batareyaya zərər verir. İdeal şarj səviyyəsi 20-30% aralığında olduqda şarj etməkdir.
- Sürətli şarj batareyaya zərərlidir: Müasir smartfonlarda sürətli şarj texnologiyası təhlükəsizlik tədbirləri ilə təmin olunub. Soyutma sistemləri qızmanın qarşısını alır və cihaz öz şarj limitlərini aşmır.
- Tətbiqləri məcburi bağlamaq enerjiyə qənaət edir: Müasir əməliyyat sistemləri fon proseslərini effektiv idarə edir. Tətbiqləri tez-tez bağlayıb yenidən açmaq əksinə daha çox enerji sərf edir.
- Telefonu gecə boyu şarjda saxlamaq olmaz: Smartfonlar 100%-ə çatdıqdan sonra şarjı avtomatik dayandırır. Buna görə gecə boyu şarjda saxlamaq batareya üçün təhlükə yaratmır.
Batareyanı qorumaq üçün faydalı məsləhətlər
Mütəxəssislər batareyanın ömrünü qorumaq üçün ekran parlaqlığını azaltmağı, lazımsız funksiyaları söndürməyi, proqram təminatını vaxtında yeniləməyi və bildirişləri məhdudlaşdırmağı tövsiyə edir. Bu qaydalara əməl etməklə batareyanın işləmə müddətini artırmaq mümkündür.