Bakıda 6 yaşlı ögey oğlunu döyərək ağır xəsarətlər yetirən Rəşad İsmayılovun cinayət işi üzrə məhkəmə başa çatıb.
İstintaq materiallarına əsasən, Rəşad İsmayılov 2024-cü il martın 8-də səhər saatlarında həyat yoldaşı Aynur Həsənovadan yemək tələb edib. Yeməyin gecikməsinə əsəbiləşən Rəşad, yatan otağa keçərək 6 yaşlı Nuranı amansızlıqla döyüb. Uşağın huşunu itirməsinə baxmayaraq, onu sürüyərək çölə çıxarıb və döyməyə davam edib.
Səslərə oyanan 8 yaşlı ögey qızı Şəbnəm, qardaşının döyülməsinin şahidi olub, lakin qorxusundan müdaxilə edə bilməyib. Anası Aynur Həsənova müdaxilə etdikdə, Rəşad uşağı xəstəxanaya aparmaq əvəzinə, onun ölməsini istəyib və hadisəni bədbəxt hadisə kimi qələmə verməyi planlaşdırıb.
Aynur Həsənovanın israrları ilə uşaq xəstəxanaya çatdırılıb, lakin aldığı xəsarətlər nəticəsində Nuran eşitmə, danışma, görmə və yerimə qabiliyyətini itirib. Qorxusundan hadisəni gizlədən ana, bir neçə ay sonra polisə müraciət etmək məcburiyyətində qalıb.
Rəşad İsmayılov Cinayət Məcəlləsinin müxtəlif maddələri ilə ittiham olunaraq, Bakı Ağır Cinayətlər Məhkəməsinin hökmü ilə 15 il müddətinə azadlıqdan məhrum edilib.