Buzlu suyun arıqlamağa kömək etməsi və istidən qorunma üsulu olması ilə bağlı yayılan fikirlər əslində nə qədər doğrudur? Rusiyalı diyetoloq İrina Pisaryeva bu mövzuda maraqlı açıqlamalar verib. O, buzlu suyun sağlamlığa potensial risklərini vurğulayaraq, populyar mifləri təkzib edib.
Buzlu suyun kaloriyə təsiri: Mütəxəssis bildirib ki, orqanizmin buzlu suyu isitmək üçün kalori sərf etməsi nəzəriyyəsi elmi cəhətdən doğru olsa da, bu, əhəmiyyətli nəticələr vermir. Hesablamalar göstərir ki, 2 litr buzlu suyu bədən temperaturuna çatdırmaq üçün cəmi 70 kalori sərf olunur. Bu rəqəm arıqlamaq üçün yetərli deyil, ona görə də buzlu suyu “yağ yandıran” içki kimi qəbul etmək mənasızdır.
Buzlu suyun zərərləri: Diyetoloq qeyd edib ki, idman sonrası və ya isti havada sərinləmək üçün buzlu su içməyin zərərləri faydalarından daha çoxdur. Buzlu su:
* İsti çaydan və ya yeməkdən sonra içildikdə diş minasında mikroçatlar yarada bilər.
* Qıcıqlanmış bağırsaq sindromu olan şəxslərdə əzələ spazmına və ağrılara səbəb ola bilər.
* Angina və xroniki tonzillit xəstələri üçün soyuqlamaya və xəstəliyin kəskinləşməsinə yol aça bilər.
Həkim vurğulayıb ki, temperaturun kəskin dəyişməsi orqanizm üçün ciddi stressdir və sağlamlıq problemləri olan insanlar üçün təhlükəli ola bilər.