Milli Məclisin iclasında qadın hərbçilərin xidmət müddəti ilə bağlı mühüm bir dəyişiklik qəbul edilib. Qadınlar üçün müddətdən artıq həqiqi hərbi xidmət müddəti 3 ildən 6 ayadək endirilib.
Bu dəyişiklik “Hərbi xidmətkeçmə haqqında Əsasnamə”nin təsdiqi və “Hərbi vəzifə və hərbi xidmət haqqında” qanunlara təklif edilən dəyişikliklər çərçivəsində baş tutub.
Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev qanun layihəsini təqdim edərək, bu addımın qadın hərbçilərin hərbi xidmətə adaptasiyasını asanlaşdıracağını vurğulayıb.
Mövcud qanunvericiliyə əsasən, müddətdən artıq həqiqi hərbi xidmətə qəbul olunan qadınlar üçün ilkin müqavilə müddəti 3 il idi. Lakin, qadınlar birbaşa müddətdən artıq xidmətə qəbul edildikləri üçün adaptasiya prosesində çətinliklər yaşayırdılar. Yeni dəyişiklik bu problemi aradan qaldırmağı hədəfləyir.
Qanun layihəsində qadınlarla bağlanan ilkin müqavilə müddətinin 6 ayadək azaldılması, onların hərbi xidmətə daha asan uyğunlaşmasına, kadr axınının azalmasına və hərbi xidmətin səmərəliliyinin artırılmasına töhfə verəcək.
Müzakirələrdən sonra qanun layihəsi səsverməyə çıxarılaraq üçüncü oxunuşda qəbul edilib.