Azərbaycan Respublikasının Prezidenti İlham Əliyev Novruz bayramı münasibətilə Azərbaycan xalqına təbrik ünvanlayıb. Təbrikdə deyilir:
Hörmətli Azərbaycan xalqı!
Sizi Novruz bayramı münasibətilə ürəkdən təbrik edir, hər birinizə möhkəm cansağlığı, xoşbəxtlik və fəaliyyətinizdə uğurlar arzulayıram.
Novruz bayramı Azərbaycan torpağında dərin köklərə sahibdir və ulu əcdadlarımızdan bizə miras qalıb. Bu bayram milli düşüncəmizin ayrılmaz hissəsi olaraq, mədəni dəyərlərimizin formalaşmasında mühüm rol oynayıb. Novruz mərasimləri xalqımızın nikbinliyini, təbiətə sevgisini və parlaq gələcək arzularını əks etdirir.
Xalqımız Novruz ənənələrini qoruyaraq bu günə qədər yaşadıb. Bu bayram bəşəri dəyərlər və zəngin mənəviyyat xəzinəsi kimi dünya mədəni irsində özünəməxsus yer tutur. Novruz bayramı ölkəmizin hər yerində əsrlərdən qalan adət-ənənələrə uyğun şənliklərlə qeyd olunur.
İnanıram ki, yazın təravəti gələcəyimizi qurmaq üçün bizə yeni enerji verəcək. Biz azad edilmiş torpaqlarımızı cənnətə çevirmək üçün səylə çalışacağıq.
Qarşıdan gələn Novruz bayramı qəlblərinizi sevinc və işıqla doldursun! Sizə xoş bahar əhval-ruhiyyəsi, evinizə sülh, firavanlıq və bol ruzi-bərəkət arzulayıram!
Bayramınız mübarək olsun!