Zərdab Rayon Polis Şöbəsinin əməkdaşları tərəfindən keçirilən xüsusi əməliyyat nəticəsində, narkotik maddələrin qanunsuz dövriyyəsində şübhəli bilinən 65 yaşlı Elçin Əliyev saxlanılıb.
Daxili İşlər Nazirliyinin Mətbuat Xidmətinin Şirvan regional qrupunun verdiyi məlumata əsasən, şübhəli şəxsdən ümumilikdə 8 kiloqramdan artıq marixuana, tiryək, metamfetamin və psixotrop maddələr aşkar edilib.
Aparılan araşdırmalar zamanı Elçin Əliyevin bu narkotik maddələri Bakı şəhərinə aparmağı planlaşdırdığı müəyyən olunub.
Hadisə ilə əlaqədar cinayət işi başlanıb və Elçin Əliyev barəsində həbs qətimkan tədbiri seçilib. İstintaq davam edir.