Bakıda borc üstündə baş verən bıçaqlanma hadisəsinin təfərrüatları məlum olub. Xəyal Hüseynov adlı şəxs, dostu Elnur Məmmədovun 20 manat borcunu tələb etməsi nəticəsində onu bıçaqlayıb.
Hadisə necə baş verib?
İstintaq materiallarına əsasən, 2025-ci ilin yanvar ayında Elnur Məmmədov, Xəyal Hüseynovun evinə gələrək borcunu istəyib. Borcun vaxtında qaytarılmaması tərəflər arasında mübahisəyə səbəb olub. Xəyal, Elnurun ünvanına nalayiq ifadələr işlətməsini əsas gətirərək, yaxınlıqdakı köşkdən bıçaq götürüb və Elnura hücum edib. O, Elnuru öldürmək məqsədilə ona çoxsaylı bıçaq zərbələri endirib.
Xəyal Hüseynov, xuliqanlıq niyyəti ilə Elnur Məmmədovu qəsdən öldürməyə cəhd edərkən, əlindəki bıçaqla onun bədəninin müxtəlif nahiyələrinə, o cümlədən üzünə, döş qəfəsinə, qoltuqaltına və boyun nahiyələrinə 6 bıçaq zərbəsi vurub. Bu zaman yaxınlıqda olan Səbuhi Əliyev davaya müdaxilə edərək Xəyalın hərəkətlərinin qarşısını alıb. Elnur Məmmədov isə dərhal hadisə yerindən qaçıb.
Cinayət işi
Xəyal Hüseynova qarşı Cinayət Məcəlləsinin 29, 120.2.2-ci (xuliqanlıq niyyəti ilə adam öldürməyə cəhd) və 221.3-cü (xuliqanlıq) maddələri ilə ittiham irəli sürülüb. Məhkəmə prosesi Bakı Ağır Cinayətlər Məhkəməsində hakim Hüseyn Hüseynlinin sədrliyi ilə davam etdirilir.