Qazaxıstan hökuməti AZAL təyyarəsinin qəzası ilə bağlı texniki araşdırmaların nəticələrini əldə edib. Baş nazirin müavini Kanat Bozumbayev bildirib ki, hazırda komissiya üzvləri, o cümlədən Rusiya nümayəndələri nəticələri yekunlaşdırır.
Bozumbayev jurnalistlərə açıqlamasında bunları qeyd edib:
- İstintaq davam edir.
- GPS izləyiciləri, naviqasiya avadanlıqları və təyyarə istehsalçısından zəruri müayinələr alınıb.
- Nəticələr komissiya üzvləri ilə razılaşdırılacaq.
- Komissiyaya Azərbaycan, Qazaxıstan, Rusiya Federasiyası, “Embraer” və Beynəlxalq Mülki Aviasiya Agentliyinin nümayəndələri daxildir.
Xatırladaq ki, 2024-cü il dekabrın 25-də Aktau yaxınlığında Bakıdan Qroznıya uçan AZAL təyyarəsi qəzaya uğrayıb. Təyyarədə 67 nəfər olub, onlardan 29-u sağ qalıb. Qəzada Azərbaycan, Rusiya, Qazaxıstan və Qırğızıstan vətəndaşları həlak olub.
2025-ci il yanvarın 7-də qara qutuların açılması başa çatıb və məlumatlar Qazaxıstana göndərilib. Fevralın 4-də Qazaxıstan Nəqliyyat Nazirliyi qəzanın araşdırılması üzrə ilkin hesabat dərc edib.