Everestdə tullantılara qarşı yeni qaydalar
Everest zirvəsinə (8848.86 m) dırmaşan alpinistlər indi 2-ci baza düşərgəsindən (6400 – 6750 m) yuxarı ərazilərdən ən azı 2 kiloqram tullantı gətirməlidirlər. Bu yeni qayda Nepal hökuməti tərəfindən dünyanın ən yüksək zirvəsində tullantıların idarə olunmasını gücləndirmək üçün tətbiq edilib.
Saqarmatxa Çirklənməyə Nəzarət Komitəsi (SPCC) bildirib ki, alpinistlər onsuz da ekspedisiyanın sonunda baza düşərgəsinə 8 kq tullantı təhvil verməlidirlər. İndi onlar zirvəyə yaxın yüksəkliklərdən əlavə 2 kq tullantı toplamalıdırlar. 2-ci düşərgədəki SPCC işçiləri qaydaya əməl olunmasına nəzarət edəcəklər.
Komitənin direktoru Tserinq Şerpa bu mövsümdən etibarən alpinistlərin şəxsi tualet torbalarından istifadəsinin qadağan olunduğunu elan edib. Onlar SPCC və yerli bələdiyyə tərəfindən təmin edilən xüsusi torbalardan istifadə etməlidirlər. Bu tədbir alpinistlərin dağda tullantı torbaları atmasının qarşısını almaq məqsədi daşıyır. Tserinq Şerpa bildirib ki, verilən torbalar qeydiyyata alınacaq və alpinistlər qayıtdıqda geri qaytarılmalıdır.