ABŞ dövlət katibi Marko Rubio, Fransada keçirilən G7 ölkələrinin xarici işlər nazirlərinin toplantısında İranla davam edən qarşıdurmanın yaxın 2-4 həftə ərzində davam edəcəyini bildirib.
Vaşinqtonun Tehranla əsaslı danışıqlara başlamaq üzrə olduğu da qeyd olunub. Hazırda ABŞ, İranla əlaqələri vasitəçilər vasitəsilə qurur.
Fevralın 28-də İsrailin müdafiə naziri İsrail Müdafiə Qüvvələrinin İrana qabaqlayıcı zərbə endirdiyini açıqlamışdı. Daha sonra ABŞ Prezidenti Donald Tramp da ölkəsinin bu əməliyyatda iştirak etdiyini bildirmişdi.
İran isə cavab olaraq İsrailə onlarla ballistik raket atmışdı. Martın 1-də İranın Ali Lideri Əli Xameneinin hücumlar zamanı öldürüldüyü iddia olunub.
Həmçinin, İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib, nəticədə həmin ölkələrdə hava məkanı müvəqqəti bağlanıb və Hörmüz boğazından gəmilərin keçidində ciddi problemlər yaranıb.