Rusiyalı psixoterapevt İrina Kraşkina bildirib ki, sürətli həyat tərzindən uzaqlaşmaq psixoloji sağlamlıq üçün əhəmiyyətlidir. Onun sözlərinə görə, asta hərəkət edən insanlar daha az stres yaşayır və nəticədə daha xoşbəxt olurlar.
Mütəxəssis qeyd edib ki, yavaşlamaq tənbəllik deyil, özünütənzimləmə və səbir deməkdir. Bu cür insanlar həyatlarını daha mənalı və az stresli hesab edirlər. Araşdırmalar göstərir ki, yavaş temp daxili gərginliyi azaldır və zamanın kifayət qədər olması hissini artırır, bu da psixoloji vəziyyəti yaxşılaşdırır.
Həkim əlavə edib ki, daimi tələsmək orqanizmi simpatik sinir sistemi rejimində saxlayır, bu da kortizol səviyyəsinin yüksəlməsinə, narahatlığın artmasına, yuxu və diqqət problemlərinə səbəb olur.
Əksinə, tələsməmək “dincəlmə və bərpa” rejimini aktivləşdirir, bu da yaradıcı düşüncə və analiz qabiliyyətini artırır. Kortizol səviyyəsi aşağı düşür və idrak çevikliyi yüksəlir. Səbir zehni sağlamlıq üçün çox vacibdir. Səbirli insanlar daha az baş ağrısı və dəri problemləri yaşayırlar.
Psixoterapevt gündəlik həyatda, məsələn, növbələrdə və ya tıxaclarda səbirli olmağın ümumi rifah hissi ilə əlaqəli olduğunu vurğulayıb. O, səbirli olmağı inkişaf etdirmək üçün müəyyən məşqlər tövsiyə edib: telefonsuz gəzmək, fasiləsiz bir işi tamamlamaq və vaxtı düzgün planlaşdırmaq.