"Bu günə qədər sülh müqaviləsinin mətni tam razılaşdırılıb, 17 paraqrafdan ibarətdir. Azərbaycan burada hər hansı bir əlavə şərt irəli sürmür. Bizim şərtlərimiz Ermənistan üçün bəllidir, yenilik deyil. Bu şərtləri biz uzun müddət ərzində irəli sürürük. Ancaq Ermənistandan bu günə qədər hər hansı bir ciddi cavab almamışıq. Nədən ibarətdir bu? Birinci, ATƏT-in Minsk qrupu ləğv edilməlidir" - bu fikirləri Prezident İlham Əliyev Almaniya Prezidenti Frank-Valter Ştaynmayer ilə mətbuata bəyanatında söyləyib.
Dövlət başçısı əlavə edib: "İkinci məsələ Ermənistanın konstitusiyası ilə bağlıdır. Ermənistan konstitusiyasında Ermənistan müstəqillik aktına istinad var. O konstitusiyanın tərkib hissəsidir. Orada isə Azərbaycanın hüquqi, tarixi ərazisi Ermənistanla birləşməsi haqqında müddəa var və bu, bizə qarşı açıq ərazi iddiası sayılır. Ona görə Ermənistan konstitusiyasından bu bəndin çıxarılması bizim legitim tələbimizdir. Bu iki şərt təmin olunandan sonra sülh müqaviləsini imzalanmaq üçün heç bir maneə olmayacaq. Necə deyərlər, top Ermənistanın tərəfindədir. Əgər Ermənistan doğurdan da sülh müqaviləsini imzalamaq istəyirsə, Azərbaycanın bu iki legitim şərtini qəbul etməlidir".
Bəs görəsən Ermənistan Azərbaycanın şərtlərini qəbul edəcəkmi?
Politoloq Tural İsmayılov bu barədə Sonxeber.az -a açıqlama verib:
"Ermənistanın Azərbaycanın şərtlərini qəbul etməkdən başqa yolu qalmayıb. Hal-hazırda Ermənistanın bütövlükdə normal bir dövlət kimi özünü təsdiqləməsi, həmçinin, düşdüyü qaranlıq vəziyyətdən çıxmasının yeganə yolu Azərbaycanla münasibətlərini normallaşdırmasından və Türkiyə ilə sərhədlərin açılmasından asılıdır. Faktiki olaraq Ermənistan reallığı dərk etsə də, təəssüflər olsun ki, iradə göstərə bilmir. Nəticədə özünü çıxılmaz vəziyyətə salır. Prezident İlham Əliyev Almaniya prezidenti Frank Valter Ştaynmayer ilə Bakıda mətbuata verdiyi bəyənnatda Ermənistan üçün artıq bütün limitlərin tükənməyə getdiyini vurğulayıb. Çünki, iki ölkə arasındakı sülh müqaviləsi ilə bağlı 17 bəndlik razılaşma əldə edilib, amma Ermənistan bu məsələdə manipulyasiyalarına davam edir və vəziyyətin düzəlməsi üçün heç nə etmir. Bu gün bizim qarşımızda təkcə Ermənistan deyil, Fransa və onun havadarları da dayanır. Hansı ki, onlar iki ölkə arasında razılaşmaların əldə olunmasını istəmirlər. Bu gün Ermənistan dayanmadan Azərbaycana qarşı təxribatlar törədir. Qarşı tərəf başqa yolunun qalmadığını nə qədər tez dərk etsə, sülh müqaviləsi də o qədər tez imzalanacaq"
Mənbə: https://sonxeber.az