Prezident İlham Əliyev aprel ayında Çinə səfər edəcək.
Bu barədə "Azərbaycan-Çin strateji tərəfdaşlığı: Qlobal Cənubda konsolidasiya və əməkdaşlığın təşviqi" mövzusunda konfransda Çin Kommunist Partiyası Mərkəzi Komitəsinin (ÇKP MK) üzvü, ÇKР МК Beynəlxalq əlaqələr şöbəsinin müdiri Lyu Cyançao bildirib.
"İlham Əliyevin Çinə səfəri iki ölkə arasındakı münasibətlərin inkişafına müsbət təsir göstərəcək" - bunu Sonxeber.az -a açıqlama verən politoloq Tural İsmayılov deyib:
"Azərbaycanla Çin arasında çox yaxşı əməkdaşlıq perspektivləri mövcuddur. Bu münasibətlər sistemi hər gün daha da inkişaf edir. Azərbaycan prezidenti İlham Əliyev və Çin rəhbəri Si Tsinpin arasında üstün səviyyəli əlaqələr mövcuddur. İlham Əliyevin Çinə səfəri iki ölkə arasındakı münasibətlərin inkişafına müsbət təsir göstərəcək.
Ötən il iki ölkə arasında müqavilə imzalandı və artıq Çin vətəndaşları Azərbaycana vizasız şəkildə gələ bilirlər. Azərbaycan Çinin də gələcəkdə bizim vətəndaşlarımız üçün belə bir imkan yaradacağını gözlədiyini müxtəlif platformalarda bildirir. İki ölkə əlaqələrinin yüksək keyfiyyəti ilə bağlı prezident İlham Əliyevin Çinin dünyaca məşhur nüfuzlu televiziya kanallarına verdiyi müsahibələr daha əvvəllər tirajlanıb. Bu baxımdan prezidentimizin Çinə səfəri iki ölkənin münasibətlərinin hazırkı perspektivi və gələcək inkişaf potensialı baxımından vacib və müstəsna əhəmiyyətə malikdir. Azərbaycan və Çin əlaqələri bundan sonra da yüksələn xətt üzrə inkişaf edəcək. İlham Əliyevin Çinə səfərindən sonra Çinlə münasibətlərimizin daha da təkmilləşəcəyini düşünürəm"
Çiçək Sadatova
Mənbə: https://sonxeber.az